قصيدة الأمير محمد السديري و رد عليه بمثلها الأمير نايف بن عبدالعزيز

قصيدة الأمير محمد السديري :

أنتم حباريكم تخافق بالاقفار
وحنا حبارينا السمك يالسنافي

وبايمانكم شقر سريعات الاطيار
والكل منهن ماضي الفعل وافي

ذكرتني يامير واصبحت محتار
وجاوبت خلج البل حم الشعافي

وذكرت طيب ايامنا سر وجهار
يوم الردى في نومة العصر غافي

مذكور يانايف ذرا الضيف ومجار
ذكراك في قلب براه الولافي

قلب عن الشدات يامير صبار
ان صد عن طيب الثنا كل هافي

**

رد سمو الامير نايف بن عبدالعزيز :

قصيدة الأمير محمد السديري و رد عليه بمثلها الأمير نايف بن عبدالعزيز 365082812

ياخال روحتوا لنا ستة اسطار
رفاع المعاني كملتها القوافي

مثايل يختارها كل محتار
مثل الرعاف بجيد ظبي الكشافي

حييت فيها والتحيه لها كار
ماغرد القمري بروس الخوافي

ليتك خوي لي الى شبة النار
في مربخ من وقدة الرمث دافي

نبته جديد ماطلع فيه نوار
سقاه مامور من الوسم ضافي

ممطور أمس ولامشى فيه دوار
فيه الحبارى مقبلات مقافي

اشيل فرخ واسهن وقع وطيار
وعلى يسارك اشقر الريش صافي

هذا عدو الخرب للريش نثار
وهذا الى طلع على الجو شافي

ماكدر الخاطر طويلات وقصار
هروج هزيله من رجال ضعافي

من لابة يردون صعبات الاخطار
ماوالفوا نوم الصفر والعوافي

نقضي لنا وقت وندفن لنا اسرار
الصبر زين وخير الايام تافي

عاداتنا نقصر طويلات الاشبار
وعدونا نسقيه سم زعافي

الى عطل الواجب من الناس حبار
نارد ولو ان الموارد عيافي

نارد حياض وردها حامي حار
وبيماننا مصقلات رهافي

لعيون تلع سوقهن مابعد بار
حديثهن لمجرح القلب شافي